छविराज उप्रेती
भयो बेला चिन्तन मनन गर्ने देश भरिका ।
भला नेता ज्ञानी जन मिली यथा योग्य तरिका ।।
परि पाटी राम्रो प्रगती पथ मर्यादित पनि ।
बनोस् सब्को मान्यै सदनवत संस्था दल अनि ।।
लिई आफ्नो वशमा जिती नर नारी जनको ।
बनाउन् सते न्यायी सत पुरुष सरकार सदनको ।।
यथावत् जनताको प्रतिनिधि भई त्यो सदनको ।
गरोस् शासन देशमा सकल विधी कल्याण जनको ।।
विधि लोकतान्त्री परम सत आधारित पनि ।
व्यवस्थाको पालन गरी रहनु कर्तव्य हो भनी ।।
बुझ्नु सब नेताले हित अहित आफ्नो र जनको ।
गरुन सेवा देशको मिलीकन सबै राष्ट्र धनको ।।
सबै जाती भाषा जन जन विशे भेद नगरी ।
पृथक स्पर्सी कल्मज, अनि त सब त्यागौं घर घरी ।।
मदेशी , पहाडी, विविध मय जाती जति छन् ।
सबै भू आमाका प्रणयवत सन्तान् हुन तिन ।।
सबैको हक पुग्ने विविध विविध ज्ञानमय को ।
रचौं लौ सम्विधान् समविधि कुसुम सौम्य लयको ।।
नवदुर्ग गा.वि.स. ८ दावली, महेन्द्रनगर
हाल महेन्द्रनगर ३, भासी कञ्चनपुर