म फेरी जन्मने छु

---

स्मिता मगर

रुकुम

 

एका समयमा

सुर-असुर कुरुक्षेत्रमा काटाकाट गरेको

मैले सुनेको छु.

सुरसँग हारेर असूर नर्कमा झरेको

भो, यस्ता कथा मलाई नसुनाऊ !

आँखा अगाडि मैले

मान्छे-मान्छे मारामार गरेको देखेको छु

मान्छेसँग मान्छे हारेको देखेको छु ।

 

बन्दुक बोकेर देखाएका

वीरताका कथाहरू

मैले पढेको छु

बारुदले भरिएका जोसिला

युद्घ-गीतहरू सुनाएर

मलाई नजिस्काउ ।

 

तिम्रो बारुदमा मैले

रित्तिएका काखहरूको चीत्कार सुनेको छु

फुटेका चुराहरूको रोदन सुनेको छु ।

 

ए, युद्घ रचयिताहरू हो !

धेरै भयो तिम्रो रचनामा

मलाई जलाउन खोजेको

डर-त्रास देखाइ म भित्र

रमाउन खोजेको

यता हेर !

ती स्वयम्भूका जीवन्त जोर आँखाले हेरिराखेको

र आफ्नो तेज प्रकाश छर्दै

चुपचाप हामीलाई भनिराखेको

कालो बादल हटाएर सूर्य नउदाएको कहाँ छ र ?

संसारभरि आफ्नो तेज प्रकाश छर्दै

म फेरी जन्मने छु तिमीभित्र ।

 

तिम्रो रगतमा मेरो रगत बगेको छ

तिम्रो आत्मामा मेरो आत्मा लुकेको छ

तिमीलाई खोज मात्र

निडर भएर खोज

निर्भिग्न भएर खोज

मैले तिमीभित्र बुद्घ जन्मिएको देखेको छु

मैले तिमीभित्र बुद्घ ब्यूँझिएको देखेको छु ।

Author - स्मिता मगर | Posted on Aug 5 2010 Thursday | Views : 4800
कुसुस्को राष्ट्रिय कविता प्रतियोगिता २०६६