\'यस्तो हुने छ यो माटो\'

---

पंकज सुनुवार

कुवुँ काँस्थली २, रामेछाप

 

हजारौं वर्ष देखि खोसिएको

यो परिचय

यो अस्तित्व

र त्यो गुफा

हजारौं वर्षपछि आज बौरिएको छ, एउटा इतिहास

बजाउदै ढोलझ्याम्टहरू, दम्फुटुङनाहरू यस्तै यस्तै .....

यो परिचय जसले अरुको परिचयलाइ थामेको छ

यो अनुहार जो कैयौ पटक अपहेलित भएको छ

यो गुफा जसले जङ्गलिझुपडिको पिडा रहेको छ

हो

त्यहि, परिचयले समान्तको ज्ञान सिकाउथ्यो

त्यहि अनुहारलाई त्यो माटोको माया लगाउथ्यो

त्यहि गुफाले हाम्रो पूर्खा जन्मायो

जहाँबाट आँगन  झैँ तराई भेटिन्थ्यो

धुरि झै हिमाल देखिन्थ्यो

र

धड्कन्थ्यो बनेर मुटु निरन्तर ।।

लाग्छ

मेरो अस्तित्व,

मेरो भाषा छ,

मेरो यो पहिरनमा छ

मेरो यो अनुहारमा छ 

कैयौं बहानामा, कैयौं भरासामा

खोसियो त्यो परिचय, त्यो मुटु

अनि सिकाइयो सदियौं देखि एउटै केन्द्रिकृत गणितीय फरमुला

र धोकायो कुनै एउटा धर्मग्रन्थ

अनि बाँधिनु पर्‍यो ठूलो जन्जिरले सानो किलामा

र छाड्नु पर्‍यो मैले मेरै लगापूर्गिलाई मेरै साकेलासिलिमा

यस्तै यस्तै.. पिडा पाएको छु

मैले मेरो \'म\' गुमाउदा

धेरै पटक बनिसकेकोछु मुखदर्शन,

मेरै अगाडि मेरो पूर्खालाई पर सारिदा ।

कैयौं पटक बनिसकेको छु मूर्ती पार्कहरूमा,

मेरै सामु ची फुर्मा र सुम्निमालाई निरवस्त्र पारिदा

हो,

त्यहि पिडा र दुःखले दन्काएर आगो

चेतनाहरू किनारबाट उम्लिएर,

हिमालबाट पग्लिएर सन्तुलित

पहाडका कुना कन्दरासम्म

विचार उभिएको छ शरिर

र अडिएको छ यो भूतल ।।

 

आएको छ आज त्यो जिजीविषा हाम्रो झुप्रोमा

त्यसैमा लाम्बद्घ फूलहरूको माहोल बोकेर

न कुनै आन्दोलित भीड हो यो

न कुनै खेल नै

गर्दै खबरदारी

आफ्नै गुफाका लागि, आफ्नै भाषाका लागी

सिउदै सिउदै

छरिएका फूलहरू एउटै धागोमा

बनेर माला एउटै, यो बाटोबाट

भएर सियो यो माटोबाट ।।

 

चीं फूर्मा:- सुनुवार जातको कुशल महिला

सुम्निमा:- किराँतीहरूको देवी वा रानी ।

Author - पंकज सुनुवार | Posted on Aug 6 2010 Friday | Views : 5660
कुसुस्को राष्ट्रिय कविता प्रतियोगिता २०६६