सडक

---

खुल्ला आकाश मुनि बसेर

म पहरेदारी गरिरहेँछु

इतिहासको लिखित अलिखित अध्यायहरूको

मलाई जम्मै थाहा छ

तोक र आदेशमा

कतिचोटि फर्फरायो यो देशको राष्ट्रिय झण्डा ?

क-कसले खोज्यो निभाउन

विचारका राँकाहरू ?

 

कहाँसम्म फैलियो

जलाइएका झुपडीहरूको गन्ध ?

 

झोलाभरि

देशको गीत बोकेर

कोको गएका छन् सीमानाको खोजीमा ?

 

क-कसले बजार्‍यो बुट

विधुवा र टुहुरा छातीहरूमा ?

 

कतिचोटि चिच्यायो

घण्टाघर

र, को को ब्यूाझिए ?

मलाई यो पनि थाहा छ

यही शताब्दीमा भत्किने छ

मालिक र दासबीचको पर्खाल

यही शताब्दीमा फेरिने छ संविधान

 

यही शताब्दीमा

युगले-युगलाई सुम्पिने छ नासो

 

यत्तिखेर

खुल्ला आकाश मुनी बसेर

म पहरेदारी गरिरहेँछु

इतिहासको लिखित अलिखित अध्यायहरूको

र, गुन्गुनाइरहेछु

यही शताब्दीमा फेरिएको

यो देशको राष्ट्रियगान ।

 

काठमाडौं

(कुलदीप सुनुवार स्मृति राष्ट्रिय कविता प्रतियोगिता २०६७ मा \\\"प्रथम\\\" पुरस्कृत कविता)

Author - प्रदीप राजभन्डारी | Posted on Dec 21 2010 Tuesday | Views : 5890
नेपाली साहित्य