म हङकङ भइसकेछु


म हङकङ भइसकेछु

          हाङयुग अज्ञात

सातिन र हेप्पीभ्यालीमा दौडिने

बाजीको घोडाजस्तै

अथवा जमिनमुनि दौडिने

रसआवरको रेलजस्तै

यो एसियाको विश्वसहरमा

श्रम बेच्न दौडेको पनि

थाहै नपाई

एक दशक भएछ

र हिजो बेलुकी

जब माया सेलुनमा

ऐना अगाडि उभिएँ

तब देखेँ

फुल्न थालेका रहेछन्

कनसिरीमा कपालफूलहरू

ओहो ! देश फर्किन्छु भन्दाभन्दै

म त हङकङ भइसकेछु,

 

ताइमोशन र मंकीहिलको जङ्गलमा

चासोक, साकेवा र ल्होसार मान्दामान्दै

बिबिक्यूमा पोलिपठाइएछ उमेरको पखेटा

इन्डियाकल्ब र कङ्गनको बफेमा

पुलाउ र पर्ककरी पस्किादापस्किदै

कतिबेला रित्तो पारिएछ मस्तिष्कको प्लेट

कतिबेला रेड वाइनले कुल्ला गरिएछ

आदर्शको फट्फटाइरहने जिब्रो

कतिबेला बियरले पखालिएछ

देशको तस्बीरलाई मनको कुनाबाट र

कतिबेला टोस्ट गरिपठाइएछ कायाकल्पको नाममा

आफ्नो सर्वहारा पृष्ठभूमिको गरूङ्गो मुट्ठी !

, मेरा साथीहरू हो,

 

युनलङ थियटर र चुनवान टाउनहलमा होस्

अथवा कम्युनिटी हल यायातेइमा होस्

थाहै नपाई मैले बिर्सेछु

मेरो रगत, पसिना र आँसु ! अथवा,

नाचघरमा कम्मर मर्काउँदामर्काउँदै

कतिबेला भुँडीले आकास ताक्न थालेछ

र आँखाका चेपबाट

रेखाहरू तन्किन थालेछन्

मार्कसिक्सको सपनाबाट ब्यूँझेर

हिजो बेलुकी

जब उभिएँ माया सेलुनमा

तब देखेँ घामले डढेको

आफ्नो दिक्कलाग्दो अनुहार

ओहो ! देश फर्किन्छु भन्दाभन्दै

म त हङकङ भइसकेछु,

 

, मेरो देश

म हङकङ भइसकेछु

तेसैले मेरो काखीमा हिजोआज

डुङ्डुङ्ती समुद्र गन्हाउन थालेको छ

मेरो नङमा गन्हाउन थालेको छ

लापसाप

मेरो हातमा गन्हाउन थालेको छ

इनामेल

मेरो ढाडमा गन्हाउन थालेको छ

बासीभात

मेरो खुट्टामा गन्हाउन थालेको छ

बाह्रघण्टा

मेरो मुखमा गन्हाउन थालेको छ

तिउलेलम्बू

मेरो छातीमा गन्हाउन थालेको छ

नेपोइः

हो, म हङकङ भइसकेछु !

मेरो सिङ्गो शरीरमा

गन्हाउन थालेको छ आइडी,

तेसैले ओ मेरो देश

अब इमेल नगर तिमी

नपठाऊ तिम्रा दुःखहरू

यहाँ तिम्रो गोर्खा छोरा

यहाँ तिम्रो कवि छोरा

हङकङ भइसकेको छ

र तिमीले

लाहुरेको गफमा सुनेजस्तो

यो हङकङ साँच्चैमा सुन्दर

र सुखी छैन,

 

यहाँका अग्ला भवनहरूमा

धेरै होंचा विचारहरू बस्तछन्

यहाँका सफा सडकहरूमा

धेरै फोहरी नियतहरू हिँड्दछन्

तेसैले ओ मेरो देश

तिम्रो इमेलको जवाफमा

म सुखहरू पठाउन सक्दिनँ

म शान्तिहरू पठाउन सक्दिनँ

मात्र पठाउन सक्छु

अहङ्कार, इर्ष्या र जलनहरू !

हो, कति चाँडै

म हङकङ भइसकेछु

देश फर्किन्छु भन्दाभन्दै

देशको नामै बिर्सिसकेछु

म त हङकङ भइसकेछु

म त हङकङ भइसकेछु ।


Author - हाङयुग अज्ञात | Posted on Aug 20 2009 Thursday | Views : 4413
कुसुस्को राष्ट्रिय कविता प्रतियोगिता २०६५


थप साहित्यहरू / Other Literature


  • जीवन सपना र मृत्यु
  • आजको शिक्षा पद्घति
  • बेरोजगारीको पिडा
  • जिन्दगी
  • निर्दोष जल

  • Recent Literature
    सडक (प्रथम) by प्रदीप राजभन्डारी (काठमाडौ) on Dec 23 2010 Thursday
    पागलहरू (द्घीतिय) by ताराप्रसाद गिरी (गुल्मी) on Dec 23 2010 Thursday
    आगोको भोक (तृतीय) by राजेन्द्रप्रसाद पन्त/बैराकवी on Dec 23 2010 Thursday
    अहम् (सान्त्वना) by श्यामकुमार भट्टराई on Dec 23 2010 Thursday
    Photo Galleries

    Greetings

    Miscellaneous

    Family Photos

    Kul-dresess and others